Vieiros

A Fundación Ciclismo Galego padece "un déficit importante", segundo o seu vicepresidente, Xosé Ramón Lete Lasa. A entidade, responsábel xurídica e administrativa do Xacobeo Galicia, está a sufrir a débeda contraída co equipo pola empresa Valery Karpin S. L., que patrocinou o equipo nos seus primeiros dous anos.

No balance a 30 de xuño detéctase ese déficit, aínda que Lete asegura que se cumpriron "en tempo e forma" todos os requirimentos da Unión Ciclista Internacional, polo que "o equipo terá licenza o 4 de xaneiro".

O tamén secretario xeral para o Deporte engadiu que "a viabilidade do proxecto pasa por xestionar a débeda”. A primeira medida que se tomou foi "a redución do orzamento do equipo nun vinte por cento con respecto a 2009", que quedou fixado en 2,9 millóns de euros.

Pola súa banda, Álvaro Pino deixou constancia de que a débeda terá unha influencia "cero" no potencial do equipo para 2010, mesmo asegurou que "creo ata que temos máis potencial, porque a situación do mercado permitiunos reforzarnos moi ben axustándonos ás limitacións que nos impuña o orzamento".