Vieiros

Disque queren traer o AVE e andan todos enfurruñados, os uns porque xa lles tarda, os outros polos cumprimentos dos prazos.

E eu miro preocupada polo símbolo falocéntrico que representa. E é que os galegos e as galegas estamos afeitos a unha volta polo medio e outra polo arredor, e esa é a mellor ensinanza sexual que se lle pode dar aos mozos que empezan coa teima da fodenda.

Inconscientemente, se os nosos mozos entenden que o xeito de entrar e saír é a cen quilómetros por hora, apaga e liscamos.

Xa fai moito mal a pornografía, que parece que eses homiños e mulleriñas espidos trebellan levados polo demo -zaca, zaca, zaca- berrando a gorxa rachada, para vir agora o becho do AVE.

E digo eu, e con isto non digo nada: non sería mellor aquelar as cercanías?