De hoxe nun ano!
Cos participantes recollendo os seus tarecos e carrexándoos nos seus carriños, Xuventude Galiza Net 2009 di adeus. Agora será o momento de facer balance. Polo de pronto, 1.800 persoas estiveron na Intranet durante tres días.
...E así foi XGN09
E este si que é o resumo completo do que aconteceu neste décimo aniversario da ciberromaría. Non está todo o que foi, pero foi todo o que está.
Algúns momentos memorábeis
Xuventude Galiza Net 2009 está a piques de rematar. Nestes últimos momentos, mentres se entregan os premios dos diferentes concursos, lembramos algúns dos mellores momentos destas tres xornadas.
Arrebolamentos de campionato
Como xa é costume, este ano tamén houbo o campionato de lanzamento de DVD. Por que sempre fará vento nese intre?
Im-presionante
Algunhas das persoas participantes nesta décima edición de Xuventude Galiza Net contáronnos que lles pareceu.
Durmidos II: non todo é o que parece, amigo
Comprobamos, en vídeo, como foron os espertares deste domingo, derradeiro día de XGN09. Pero non todo é o que parece.
Tempo seco e soleado
Aínda que o tempo acompañou durante esta fin de semana, parece que despois do remate da Xuventude Galiza Net non vai seguir así. En todo caso, na Extranet pódese practicar e converterse en Martín Barreiro, por exemplo, para ofrecer a previsión meteorolóxica no plató de Chroma Key. As imaxes son de primeira hora da mañá, cando había sitio libre. Agora, haberá que facer cola.
Vistas panorámicas
A especial situación xeográfica do Multiusos do Sar permítenos ver, moi de preto, esa estrutura da que tantas veces se fala: a Cidade da Cultura, no Monte Gaiás. Iso se saímos ao exterior, claro.
Que hora é?
O ambiente de semiescuridade do Xuventude Galiza Net fai que en moitas ocasións se perda a noción do tempo. Fóra loce o sol, pero aquí todo o mundo segue concentrado diante das súas pantallas, practicamente os únicos focos de luz da enorme sala.
Proba superada
Así quedou o graffiti realizado o sábado no exterior do recinto do XGN. Unha mostra máis de que xa se están completando e cumprindo os obxectivos. Pero aínda queda un gran día por diante.
A outra carreira, amodiño
Como alternativa á Fórmula 1 das pantallas xigantes, na zona do fondo do pavillón temos unha competición de robots feitos na casa. Teñen que atopar a saída a este complicado labirinto. Evidentemente, non están guiados cun mando a distancia. E tampouco corren a velocidades de vertixe.
Zona reservada
O escenario do Multiusos Fontes do Sar está reservado á organización. Até alí só poderán subir, esta tarde, as persoas que reciban algún dos moitos premios que se entregan como remate desta romaría dixital. Será a iso das sete.
Arranque en frío
Comeza o derradeiro día de Xuventude Galiza Net. Se onte a esta hora xa case todo o mundo estaba en pé, non tanta xente puido aguantar a presión do sábado á noite. Agora, a aproveitar intensamente as últimas horas desta festa.
O software para outro mundo posíbel
Exemplo perfecto do espírito e o sentidiño que flúe a xeito polas corredoiras de XuventudeGaliza.Net é o que aquí atopamos. Software libre, programación libre e aberta, xurdida da vontade de construír e compartir entre todos. Hai algún sistema operativo perfeco? Se cadra "perfecto" é utópico, pero cando de software libre falamos, dúas ideas a non esquecer: os erros ou o que non nos guste poden ser axilmente corrixidos. Comunitaria e colaborativamente. Velaí valores a non esquecermos.
Hackers e crackers, no lado bo e na beira escura da forza...
Aprender como os amigos de remexer en computador alleo andan metendo a cibergadoupa en máquina onde ninguén lles mandou é un xeito de concienciarnos para actuar con máis responsabilidade por estes mares da rede. Seguridade explicada de xeito lúdico. Aquí unha achega.
Aqueladores, un clásico
Van agora uns anos da descuberta desta actividade que, seica no mundo tecnolóxico lle din "case mod". A nós, para a tarefa de tuneado das máquinas, acaíanos mellor a definición de "aquelar". Xa lles contamos da bricolaxe urxente. Velaquí unha mostra do que pode argallarse cun moito máis de paciencia.
Universo tecnolóxico vs Universo real
Velaquí unha exitosa recomendación. Se lles presta, levanten un chisco os olliños do computador. A organización pon a disposición de visitantes e participantes un conxunto de telescopios e asesoría ao xeito sobre o asunto da astronomía.
Do arado á fibra óptica, nun chimpo
Pois aí teñen unha estampa tomada xa ao caer a tardiña este mesmo sábado. Saímos a que nos dera o aire un momentiño e a ver o mundo fóra do paraíso tecnolóxico da banda larga. E aquí teñen a leira coa que comparte marco a sede da ciberfesta.
A insondábel vertixe da tecnoloxía
Ou tal que así é un dos nomes propostos para esta artística creación que lles achegamos, inspirada en sabe deus que teoría do caos.
Bodegón
Dicía o filósofo aquel que do caos xorde a orde? Con tanto fervedoiro tecnolóxico as temperaturas espremen os corpos e os ciber-romeiros teñen que mollar a gorxa. Que corra a auga, ou o que lle cadre.
Traspaso de ferranchos tecnotrónicos
Aí teñen a Juan, quen improvisou unha decoración pouco habitual para o seu computador, inspirado en tempos de macrocrises mundiais.
Zepelin aquelado
Aquí teñen unha obra de Alberto. Seica cando era cativo xa facía mecanos. Agora dálle por ser máis exquisito. Aquí unha filigrana mecánica.
Ponlle un doce á crise
Velaí, de medio en medio euro, poden facerse cunha lambetada en beneficio dunha boa fin.
Durmidos
Vexan como se dorme no Xuventude Galiza Net (e como se esperta a xente que está durmida). Estilo The Blair Witch Project.
A conta atrás final
O momento de apoteose interneteira é, sen dúbida, a conta atrás de "acendido" oficial de Xuventude Galiza Net, a medianoite do venres ao sábado. Así se viviu este ano.
Arte na rúa
Como xa é tradición no XGN, a entrada do recinto -desta volta o Multiusos Fontes do Sar- acaba decorada por artistas grafiteiros con moito xeito.
Conversa con Rubén Cela
Falamos con Rubén Cela, director xeral de Xuventude e Solidariedade, departamento do Goberno que organiza a XGN09, sobre os detalles da edición deste ano, a décima.
Computador felino
Neste encontro informático podemos ver dous tipos de 'modding' ou 'tuning' de computadores: os neóns e tubos estraños da Intranet, ou esta CPU personalizada para os máis pequenos que se achegan á Extranet a aprender as cousas da informática.
Aquí tamén se traballa
Ademais do evidente apartado lúdico, tamén se pode ver nesta Xuventude Galiza Net xente traballando duramente, como este rapaz, que está a darlle os últimos retoques ao seu robot para participar nas competicións que se desenvolverán paralelamente ás carreiras de Fórmula 1. Si, outra vez a Fórmula 1.
Zona de xogo para todos
A Extranet do XGN09 está ateigada de consolas para que quen queira pase un bo anaco practicando cos seus videoxogos favoritos. Non só van xogar os 1.800 que están na Intranet, no soto do Multiusos.
Materia prima para robots
Con estas pezas tan sinxelas pódense construír robots moi hábiles e sofisticados. Para acadalo é preciso asistir ao obradoiro de robótica con ferramentas Open Source. Teñen todo o día para armalos e, despois, competir para ver cal é o enxeño mecánico máis eficaz.
Orientación
Os tortuosos corredores do Multiusos do Sar poden provocar que algunhas persoas se perdan. É necesario, pois, consultar os mapas. Aínda que moitas veces non sirva para moito... Os GPs tampouco axudan.
Fórmula 1 (de verdade)
Unha parte dos participantes nesta romaría dixital seguen atentamente as evolucións automobilísticas nas pantallas xigantes do XGN09, mentres algunha xente aproveita para botar unha soneca. E iso que os motores de Alonso e compañía brúan a todo volume! Os comentarios do "calvo" tampouco axudan a conciliar o sono. Ou si?
Despois dunha dura noite
A segunda xornada do XGN arranca paseniñamente. Aínda que a meirande parte da xente que quedou durmindo como unha pedra despois dun intenso primeiro día espertou violentamente a golpe de música tecno, aínda quedan a estas horas algúns irredutíbeis durmiñentos que seguen aguantando nos seus sacos de durmir, en calquera curruncho.
En galego, por que non!
Unha vez máis, a cita da XGN09 quere servir para achegar lingua e tecnoloxías. Para vencellar idioma e modernidade e subliñar que o galego é lingua de futuro. En galego, por que non?
Os arquivos da meiga
Nunha parede do Multiusos damos con este avisto que ven vostedes na imaxe. Cóntanos do espazo web Os arquivos da meiga. Caldeirada de arquivos para todos os gustos. E o lema: Aposta polo galego!
Un tecno-café, se fai o favor
As insondábeis capacidades da conexión USB, unidas as cabeciñas sempre a discorrer cachifallos máis sorprendentes, ofrécennos achados como o que ven.
Preparando os catres
No medio do gando solto, velaí aparecen xa as mantas. Máis de momento, pouco sono se ve nas caras dos que cruzan a barreira das primeiras 15 horas conectados.
Counter Strike ou unha de xadrez?
De paseo polo Multiusos sorprendémonos cun cibernauta pouco ortodoxo. Na selva que o rodea asáltanse castelos, líbranse batallas no deserto ou nalgunha galaxia e outras cousas de acción. E aló o teñen a este ciber-romeiro, illa en océano de banda larga, botándolle unha partida de xadrez.
E ti a que vés?
Remexemos outra vez polos corredores á procura das impresións dos participantes na XGN09. Xogar, programar, parolar... en xeral: enredar. Isto é ao que aspiran algúns dos consultados.
Cine-artesáns armados de paciencia
Tomás Conde, experto en animación, explícanos que é iso do Stop-motion. Fotograma a fotograma, os participantes no obradoiro han armar as súas pequenas pezas visuais.
Un home de Gates en territorio comanche
Na volta dunha esquina topamos con Luís Martín, responsábel de Microsoft. Veu contar "Que hai de novo en Windows", desafiante título de conferencia en terra comanche coma esta: A XGN09 destaca pola súa aposta firme a prol da divulgación do software libre. Desta volta, aproveitamos para cruzar a liña ao lado escuro da forza e interesarnos por iso do Windows 7...
Atención, animais soltos
Seica a vaca é un dos animais de moda en XGN09. Velaí teñen a esta, que atopamos ceiba nun corredor, empoleirada nun computador e apuntando a cornamenta cara á cámara.
Dez! Nove! Oito! Sete!.... Aló imos!
Xa é oficial. Estamos de ciberfesta. O tradicional acendido contra a medianoite do venres axitou as bancadas dos seareiros da informática. Berros de emoción e xolda no Multiusos cando as pantallas proxectaron a conta atrás.
Bricolaxe de última hora
Que non teñen computador a man? Non hai problema. Apáñanse as pezas e búscanse os expertos. Velaquí temos a dous. Miguel e Jose, de Plexus. Un disco duro por aquí, tarxeta gráfica por aló. En tempo récord, máquina á carta.
De 9 a 21h: unha ducia de horas de ciberfesta
Xa roda a pleno pulmón cibernético a principal romaría do país. Cruzando a media tarde, os últimos en chegar buscaron asento entre o mar de computadores. Máis de 1.800 ciber-romeiros. Estamos todos? Que comece a festa!
Brindando
Todas as persoas que participan nesta edición do Xuventude Galiza Net son agasalladas con diversos utensilios para afrontar estes tres días de fervente actividade. Un exemplo é esta cunca-termo, para conservar o café -ou a beberaxe que sexa- na súa temperatura xusta. Brindas?
A guerra das galaxias Lego
Non pode haber Xuventude Galiza Net sen representación da Guerra das Galaxias -ou Star Wars-. Este ano, ademais dos xa habituais disfraces das persoas participantes, temos unha particular personificación dos personaxes de George Lucas... en forma de figuras Lego. O grupo de usuarios lego HispaLUG amósanos na Extranet, aberta ao público, as súas creacións. Seguiremos informando.
Marca de participación
Aínda que a ras do chan non o poida parecer, se ascendemos á parte superior das bancadas do Multiusos, comprobaremos que nunca participara tanta xente no XGN. Nin máis nin menos que 1.800 persoas, cunha media de idade máis elevada ca en anteriores ocasións, pois agora poden participar persoas de entre 16 e 35 anos.
Máis Fórmula 1
Aínda que no intre de tirar esta foto o propietario ou propietaria deste equipo non estaba presente, é unha mostra máis da febre que existe neste encontro informático arredor do motor e da gasolina. Para sentirse como ao volante dun bólido mentres se navega pola rede.
Dose extra de banda larga na maior ciberfesta do país
Desde a tarde deste venres, ampla cobertura e emisión en directo desde Vieiros.
Botándolle unhas carreiras
Entre os asistentes a Xuventude Galiza Net hai moitos afeccionados ao automobilismo. Non só o practicarán en diversos 'scalextrics' instalados na zona da Extranet, senón tamén a través de videoxogos e visionando na pantalla xigante as carreiras da Fórmula 1 desta fin de semana.
Bebés pingüíns xigantes e software libre
Unha enorme mascota de Galinux recíbenos na Extranet de Xuventude Galiza Net, o espazo aberto ao público en xeral. A distribución de GNU/Linux en galego podémola atopar, de balde, no posto de Mancomún. É software libre.
Estamos de estrea
Volven os carriños. A frenética actividade da entrada ao Xuventude Galiza Net 2009 volve protagonizar as primeiras horas desta festa informática que estrea un local máis amplo. Perderase alguén polo camiño? O aumento de prazas tamén fixo que haxa moita xente "virxe" na XGN.
Fíxose a escuridade
Coa apertura oficial do XGN09, apagáronse as luces. Só as pantallas dos computadores iluminan a enorme sala do Multiusos... até o acendido... á medianoite.
Discurso de benvida
Despois de dez anos, hai costumes que xa se converteron en tradicións. Como a conferencia de presentación e configuración, e o berro unánime, dos máis veteranos: "Tongo!". E os concursos aínda non comezaron...
3, 2, 1... Arranca Xuventude Galiza Net!
Dende as nove da mañá, momento en que se abriron as portas do Multiusos do Sar, van chegando escalonadamente as 1.800 persoas que participarán na décima edición de Xuventude Galiza Net, o encontro informático máis importante do país. Despois dalgúns problemas de rede ao comezo, a xente vaise preparando para xogar, compartir arquivos e descubrir algunhas cousas máis deste mundo informático. Arrancan, así, tres xornadas moi intensas e sen descanso.
Máis de 1.800 persoas estarán no décimo XGN
Nova sede e actividades como unha competición de robots, entre as diferenzas con respecto ás anteriores edicións dunha xuntanza que fai unha década.
Así foi Xuventude Galiza Net 2008
Importante esforzo en favor do software libre, aposta pola integración de persoas con discapacidade, en colaboración coa Confederación Galega de Minusválidos, participación da terceira idade... Metas conseguidas en 2008, mentres Rubén Cela, director xeral de Xuventude, da Vicepresidencia da Xunta, explicaba o que nos deparaba o 2009.
Balance da XGN07
Corenta mil participantes na área de acceso libre, alén dos 1.500 inscritos no recinto oficial. Espazo para a promoción da lingua, para o impulso do software libre, punto de encontro entre as empresas TIC galegas e o currículo de mozas e mozos ás portas do mercado laboral, lugar de unión entre as novas tecnoloxías e o patrimonio cultural. Son algúns dos valores que destacaron o director xeral de Xuventude e Solidariedade, Rubén Cela, e o subdirector xeral de Actividades e Servizos de Xuventude, Eduardo Mato, sobre o evento que se desenvolveu en Compostela en marzo de 2007.
Tres días de XGN06
"O formato era válido, pero había que darlle unha volta e repensar os contidos e os obxetivos do encontro. Por iso, introducimos tres variábeis básicas: o uso do galego no marco das novas tecnoloxías por parte da mocidade, a accesibilidade dos mozos con discapacidades e o impulso do software libre". O director xeral de Xuventude e Solidariedade, Rubén Cela, contábanos da satisfacción polo éxito desta edición da maior festa galega de internet. Organización e participantes coincidiron en gabar a ciber-romería e fan balanzo positivo destes tres días de banda larga. Era 2006.
Videos Vieiros XGN
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
(0 comentarios)
Do que falaron os blogueiros: fútbol e billardas
Velaí algúns dos destaques do blogomillo que apareceron na portada de Vieiros durante os últimos días.
NarraTIvas Dixitais, deica o xoves en Aguiño
CESGA e HP colaboran en prol das escolas rurais
Fillos de Galicia cavila disolver a asociación
“Grazas á lusofonía o galego pode acceder a impensábeis ferramentas lingüístico-informáticas”...
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto