Vieiros

Representantes de colectivos gais portugueses están que botan fume contra o célebre cantante Quim Barreiros. O seu último traballo discográfico (“Deixai-Me Chutar) inclúe o polémico tema "Casamento gay". A canción fai chanza da recente aprobación do matrimonio homosexual en Portugal describindo unha voda que remata con “bananas” de sobremesa e na que non faltan alusións que algúns consideran "homofóbicas" e "insultantes". O Jornal de Notícias recolle as palabras dun activista LGBT, Paulo Jorge Veira, que asegura que se trata “de alguén moi coñecido que está a reforzar a homofobia coa súa música”.

Con 62 anos, Joaquim de Magalhães Fernandes Barreiros, “Quim Barreiros, é un dos cantantes portugueses máis coñecidos. Máximo representante da chamada música 'pimba', un estilo de orixe moi popular e que ten o sexo e a retranca como "leit-motivs".
Natural de Vila Praia de Âncora (Caminha),Quim Barreiros é moi coñecido no noso país dende que a finais dos 80 triunfou co seu disco "Bacalhau à Portuguesa". Nos últimos anos a canción "A Cabritinha" é un tema recorrente en case todas as verbenas e moitos locais de ocio galegos.