Vieiros

O secretario xeral de Adega, Froilán Pallín, avanzou este luns que o colectivo comparecerá a finais de semana na causa aberta pola Fiscalía de Lugo nun xulgado de Mondoñedo contra o Concello de Barreiros por prevaricación urbanística.

Pallín recordou que se trata dunha denuncia da Fiscalía sobre 44 licenzas, que afectan máis de tres mil vivendas "ilegais". "A propia Axencia de Protección da Legalidade Urbanística (APLU) así o consideraba e así tamén se formalizaron contenciosos", subliñou.

O representante de Adega destacou que son licenzas que supuxeron a renuncia por parte do Concello de Barreiros a máis de 12 millóns de euros, o equivalente por aproveitamentos urbanísticos. "Non é só que sexan ilegais, senón que produciu un baleirado das arcas municipais", declarou.

"É un desastre urbanístico, con importantes repercusións económicas para as administracións", sinalou Pallín, que constatou que se chega a esta situación a partir dunhas "normas subsidiarias de 1994 que non se adaptaron", algo "bastante habitual en todos os concellos da costa galega".

"Despropósito, sen racionalidade"
En Galiza, dixo, de 78 concellos do litoral, catro teñen plan xeral adaptado. "É un despropósito", protestou, e lamentou que en Barreiros o urbanismo se fixese "sen racionalidade, como se fosen plantar cogomelos no medio do monte".

"Foise construíndo sen servizos e agora hai que os facer. Non hai abastecemento, nin saneamento da auga e, encima, cústanos diñeiro aos galegos e aos veciños de Barreiros", manifestou Pallín, que avogou por un "ordenamento urbanístico axeitado que prestixiase o valor que ten a costa".

• Anterior: Adega oponse á legalización da desfeita urbanística en Barreiros