Vieiros

O vice-voceiro do grupo do PSdeG no Parlamento, Xosé Manuel Lage, denunciou que "o goberno de Feijoo está paralizando as oposicións á función pública da Xunta". Lage deu conta de novas anomalías no acceso á función pública, como o atraso en 16 meses da publicación de notas para o corpo de enxeñeiros.

O parlamentario asegurou que dende xaneiro de 2009, 23 opositores a ese corpo levan agardando a convocatoria do último exame das probas de acceso ao grupo A1, escala administración especial, de enxeñeiros de camiños.

Lage exixiulle á conselleira de Facenda que "cese fulminantemente o Director Xeral da Función Pública" ou que ela mesmo asumise as responsabilidades "polo Expediente X no que se están a converter as oposicións á Xunta de Galicia". Por iso, presentará no Parlamento unha pregunta urxente para "que o Goberno se explique, porque existe un continuo goteo de anomalías e problemas nas probas de acceso ao emprego público".

Insistiu, ademais, en pedirlle ao Goberno que "nomee de inmediato funcionarios da inspección urbanística os opositores que gañaron a súa praza hai máis de 13 meses". Engadiu que "os continuos escándalos" arredor das oposicións están a provocar "unha gran alarma social" e "desconfianza" en quen opta a un emprego público.