Vieiros

Pasou 18 anos como bispo da diocese Mondoñedo-Ferrol até que en 2005 renunciou ao seu posto para retirarse a un segundo plano. Mais a cabeza do antigo bispo mindoniense non para tampouco na xubilación. Coñecido polas súas posicións ultraconservadoras, expresadas durante anos nas cartas pastorais coas que axitou a polémica en máis dunha ocasión, Gea Escolano segue deixando reflexións co apoio das novas tecnoloxías, desta volta cun blog no espazo web Religión en Libertad.

Baixo o cabeceiro 'Un obispo opina', José Gea Escolano deixa esta mesma semana o artigo titulado Obedecer os bispos ou o goberno?. Para Gea Escolano a resposta está clara: "Cando un cristián está ante o dilema de obedecer a Deus ou á autoridade civil, ten que obedecer a Deus". E explica: "Isto poderá non aceptalo quen non sexa católico, pero os católicos deben aceptalo se queren ser coherentes coa súa fe (...) O goberno humano é unha institución de Deus para o noso benestar". Engade máis adiante o bispo: "É posíbel que o goberno tome represalias contra quen non lle obedece, pero o católico debe afrontalas como os mártires afrontaron o martirio".

Carga contra a homosexualidade e contra o aborto
A continuación explica o bispo as causas do seu razoamento cargando contra o PSOE e advertindo que os deputados que se definan como católicos "non deben votar a favor da legalización do aborto". E de paso, recupera Escolano algunha das súas vellas teimas, como é a homosexualidade, subliñando que "non é lícito" nin o aborto, nin a equiparación do matrimonio dun home e dunha muller "cunha unión homosexual", nin "equiparar a adopción de nenos por un matrimonio que por dous homosexuais". Resume en receita para "lexisladores católicos" engadindo que "non lles é lícito aprobar calquera lei que vaia contra a dignidade das persoas e do ben común".

"Cando no tempo de Hitler se decretou non esconder os xudeus, debían os católicos obedecer esa orde? Pódese hoxe aceptar a lei que dá vía libre ao asasinato de milleiros de seres humanos coa mesma dignidade que calquera de nós?", reflexiona. "Deus xulgaranos a todos", asegura.

Valenciano de nacemento, logo de xubilarse en 2005 e deixar a diocese de Mondoñedo-Ferrol, que pasou a ser dirixida polo bispo Manuel Monge, o bispo José Gea Escolano marchou a Perú en calidade de misioneiro. Aló colabora co bispo de Carabayllo (Norte de Lima) e na parroquia de Santa María de la Providencia, explica no seu blog, "onde soe confesar unha media de seis horas todos os domingos, aparte dunhas horas cada día".