Vieiros

O pleno do Tribunal Constitucional (TC) decidiu este xoves admitir a trámite o recurso de inconstitucionalidade interposto polo goberno español contra a Lei de Caixas galegas e suspender os preceptos impugnados.

Así consta no documento elaborado polos membros do pleno, reunidos este xoves, no que sinalan que acordan "admitir a trámite" o recurso de inconstitucionalidade promovido polo Presidente do goberno español e, na súa representación e defensa, polo Avogado do Estado, en relación con dez puntos da lei galega, a reforma da cal foi aprobada o pasado decembro no Parlamento de Galicia, cos votos a favor de PPdeG e BNG e o rexeitamento do PsdeG.

Do mesmo modo, o Constitucional acepta tamén a suspensión da norma que o Estado solicita no recurso. Paralízase "a vixencia e aplicación dos preceptos impugnados" dende a data de interposición do recurso, o pasado 9 de febreiro para as partes do proceso. Para os terceiros, a decisión terá efecto dende que "o día en que apareza publicada a suspensión no Boletín Oficial do Estado".