Vieiros

O Diario Cultural da Radio Galega e o Centro Dramático Galego convocan xa a cuarta edición do seu premio de teatro radiofónico. O certame, patrocinado pola AGADIC, pretende fomentar a escrita de textos dramáticos para a radio e recuperar o formato teatral radiofónico con fórmulas contemporáneas.

Despois de tres anos de existencia, o concurso xa se vai facendo un oco dentro dos premios culturais do país. As obras seleccionadas polo xurado emitiranse na radio autonómica e formarán parte dun libro-cd que se editará cos textos finalistas. Haberá un premio do xurado e outro da audiencia, dotados con cadanseus tres mil euros.

Na anterior edición, o gañador dos dous premios Diario Cultural de Teatro Radiofónico foi Peter Buckley, de Rubén Ruibal e César Candelas, que podemos escoitar aquí.

En 2008, foran premiadas O mal da vaca, de Begoña García, por parte do xurado, e Saltimbanqui, de Lois Pérez, polo público. A primeira edición do certame fora para O bambán, de David Rodríguez.