Vieiros

Pouco durou a marcha do Orgullo Gai que intentaron celebrar os colectivos de defensa dos dereitos dos homosexuais en Moscova. A manifestación, que como vén ocorrendo desde 2006 non fora autorizada polo concello da capital rusa, pretendía aproveitar o tirón mediático do Festival de Eurovisión, nun momento no que Rusia intenta amosar a súa cara máis amábel ao continente europeo.

A policía disolveu rapidamente a concentración, celebrada perto da Universidade estatal, e detivo unhas vinte persoas, incluído Nikolài Alexeiev, un dos líderes do nacente movemento gai en Rusia. Está por ver o efecto que terá a represión da marcha no Festival,que celebra esta sábado a súa final. Algúns artistas xa expresaron a súa solidariedade co colectivo gai ruso.