Vieiros

"O Partido Popular só ten un obxectivo nesta campaña: a reconquista de España", dixo este venres o candidato do BNG á Xunta de Galiza, Anxo Quintana. Na súa opinión, o que está en xogo para os populares non é máis que unha cuestión de liderado e de sumar vitorias para volver a ter un papel prominente no Estado Español, iso si, "comezando por Galiza". Con todo, Quintana non lle augurou uns bos resultados ao PP neste propósito e vaticinou uns resultados electorais que serán "o auténtico Waterloo" de Núñez Feijoo e de Rajoy, tal e como o fora o Prestige para o ex presidente do goberno, José María Aznar.

Doutra banda, Quintana tamén asegurou que "para votar ao BNG ser católico non é ningunha peaxe insalvábel". Esta foi a súa resposta ante as declaracións realizadas polos bispos, nas que pedían un voto acorde "cos valores do evanxeo". Neste sentido, Quintana asegurou que son moitos os católicos que votan ao BNG e asegurou que non existen contradicións entre a confesión católica e o ideario nacionalista.