Vieiros

Logo de apurar os euros entre paparotas de Nadal e agasallos polo día de Reis, as tendas do país animan desde este mércores os cidadáns a espremeren outro chisco extra os petos coas rebaixas que, en tempo de crise, medirán ademais outra vez a temperatura económica a pé de rúa.

Segundo a estimación da Federación de Usuarios e Consumidores Independentes (FUCI), en Galiza o gasto medio será de 105 euros por consumidor. Os comerciantes prevén ademais descontos por riba das porcentaxes habituais, que, no caso da zona vella de Santiago de Compostela, se estiman entre o 50 e o 70%. Tomando o exemplo da capital do país, a asociación Compostela Monumental calcula que cada santiagués destinará ás rebaixas unha media de 114 euros e o 71% dos clientes adquirirá roupa, segundo unha enquisa da Federación de Comercio de Santiago e Bisbarras. Así e todo, o desembolso previsto será segundo estas cifras un 15% inferior ao rexistrado no 2008.

Os comercios da zona vella da capital galega atribúenlle ese descenso á crise e á necesidade dos clientes de "amarrárense o cinto" tras os gastos de Nadal. Na opinión do xerente de Compostela Monumental, Xosé Anxo Blanco, os estabelecementos composteláns salvaron a recta final do ano co que cualificou dos "mellores resultados de Galiza" no pequeno e mediano comercio.