Vieiros

O impulso dun "gran proxecto lácteo", o xerme do que será un grupo leiteiro autóctono, é a iniciativa estrela asociada á concesión de 192 megavatios á sociedade Ventos Cooperativos. A empresa recibe autorización para catro parques eólicos de 48 MW cada un deles. Atrás do proxecto están as cooperativas leiteiras Feiraco, Icos, Irmandiños e Colaga, que en conxunto reúnen a representación de máis de dez milleiros de explotacións agrogandeiras no país.

"Este é o maior exemplo de redistribución de riqueza en Galiza", subliñan desde as cooperativas promotoras. Alén do grupo leiteiro, propoñen outros proxectos ambientais e enerxéticos sustentábeis, así como a creación do chamado Instituto de Desenvolvemento do Campo. De xeito concreto, desde Feiraco apuntan que se trata dun inédito recoñecemento "do papel no desenvolvemento de Galiza" dos propietarios de explotacións rurais que veñen traballando en favor do mantemento e conservación do territorio.