Vieiros

A un ano dos comicios deste 9 de marzo, e nunha xuntanza mantida co secretario de Organización do PSOE, Xosé Blanco, á que asistiran tres representantes de Galeuscat, Francisco Jorquera (BNG), Josune Ariztondo (PNV) e Carles Campuzano (CIU), a urxencia da reforma da lei electoral no que lle toca ao voto emigrante xa aparecía entre os requirimentos destacados, á beira doutros como a reforma do Senado ou a renovación do Consello Xeral do Poder Xudicial.

O PSOE aparcou daquela os compromisos prometidos ao respecto e os socios de Galeuscat deixaron en segundo plano esta esixencia, manténdose os nacionalistas galegos coma os máis activos na reivindicación dos cambios no voto da emigración.

Agora e á volta do 9M, o BNG volve salientar esta demanda, e anuncia que durante a propia sesión de investidura do presidente do goberno español vai esixir esta reforma. A que foi cabeza de lista do BNG pola provincia de Lugo, Paz Abraira, avanzou este mércores que será un dos temas que os deputados electos do Bloque leven a esa sesión, pedindo que o executivo estatal se comprometa a ese cambio "nos seis primeiros meses de lexislatura e antes das autonómicas do próximo ano".

Abraira pronunciouse así mentres supervisaba o proceso de reconto do Censo de Residentes Ausentes (CERA) na Xunta Electoral Provincial luguesa, e recordando que case o 10% dos votos totais na provincia chegaron da emigración. Segundo lembrou Paz Abraira, o BNG solicita que os emigrantes voten en urna, que se cree unha circunscrición electoral específica e que computen para fixar a repartición de escanos. Segundo este último criterios, Lugo incrementaría a súa representación no Congreso, pasando de catro a cinco deputados. Nese suposto e cos números do 9M, o BNG tería conseguido un deputado pola provincia.

O PP tíralle un escano a CiU en Barcelona grazas á emigración
O último escano que CiU conseguira o 9M en Barcelona por apenas 71 apoios, cambiou este mércores de dono ao contárense os votos chegados da emigración. Segundo as novas cifras, o PP pasa a ter un escano máis, asento que perde CiU, por tan só 238 papeletas de diferencia. O resultado final está pendente do reconto de actas impugnadas.