Vieiros

Venezuela ocupou un notábel lugar como país de acollida de exilados galegos que fuxían da represión franquista, entre eles Xosé Velo Mosquera, Manuel Otero Castelao, Xosé Sesto ou Xoán Noia. Mesmo rompeu relacións diplomáticas co goberno de Franco, recoñecendo ás autoridades da República como único goberno español lexítimo entre 1945 e 1948.

A exposición está organizada por Xurxo Martínez Crespo, coordinador da edición Venezuela de Vieiros, e consta de vinte paneis fotográficos editados por Fesga (Fundación para o Estudo da Cuestión Social e Sindical de Galiza). Na presentación en Noia o autor estivo acompañado por Manuel Mera e Uxío Breogán Diéguez.

A exposición comezou o seu percorrido na Casa da Xuventude de Cangas en decembro, e poderá visitarse en Noia até o 1 de marzo. Nesa data, pecharase a mostra coa proxección dun audiovisual realizado polo Fesga e cunha cea de confraternidade no mesmo local do Centro Social Roi Soga de Lobeira de Noia (Rúa Travesa, número 3). O horario da exposición é de seis e media a oito e media da tarde, martes, xoves e sábado.