Vieiros

Escoitar.org forma parte do Proxecto-Edición, posto en marcha pola Fundación Seoane, o Marco e o CGAC, e sitúa entre os seus obxectivos a conservación da memoria sonora de Galicia, a posta en valor do patrimonio cultural inmaterial, a restauración e dixitalizacón de arquivos sonoros, o fomento da participación dos oíntes na configuración do patrimonio sonoro e, sobre todo, nos traballos de campo/gravación e contextualización dos sons ambientais do país. O resultado do proxecto pode escoitarse no sitio web de Escoitar.org, no que se recolle un mapa sonoro de Galiza, con sons naturais, industriais, humanos, e mesmo silencios.

Entre o martes 22 e o xoves 24, o CGAC acolle un ciclo de conferencias coa participación de importantes artistas sonoros como Bill Fontana, Brandon LaBelle, Llorenç Barber, Peter Cusack e investigadores como Carmen Pardo Salgado, Jean-Paul Thibaud, John Levack Drever e José Luis Carles. Entre todos reflexionarán sobre a importancia do son, tanto para a conformación dunha visión do mundo como da propia identidade, dende unha óptica artística e estética, mais tamén dende unha perspectiva analítica.

As conferencias completaranse cun ciclo de de cine (Audiovisións) que terá lugar no CGAC do 4 ao 16 de marzo de 2008.