Vieiros

A Garda Civil confirmou que, tal e como aseguraban dende Ceivar, hai xa tres mozos detidos acusados de intentar colocar un artefacto explosivo en Portosín. Segundo fontes oficiais, os mozos, que terían idades comprendidas entre os 18 e os 20 anos, están a prestar declaración.

As primeiras informacións apuntan a que os dous primeiros arrestados son veciños de Santiago de Compostela e que foron soprendidos por unha patrulla da Garda Civil cun artefacto no maleteiro do vehículo no que viaxaban. Algunhas fontes cren que preparaban un atentado contra unha caseta dunha axencia inmobiliaria. A terceira detención produciuse a primeiras horas da mañá deste venres. Os axentes cren que o último arrestado está relacionado co caso.

As familias e os letrados dos tres detidos están intentando poñerse en contacto con eles. Porén, crese que as autoridades van aplicar as leis especiais que permiten manter incomunicados aos arrestados por este tipo de delitos até un máximo de cinco días.

Anteriores:

• Ceivar afirma que son xa tres os detidos por portar un artefacto explosivo en Portosín

• A Garda Civil prende dúas persoas en Portosín que portaban un artefacto explosivo