Vieiros

O Departamento de Interior do goberno vasco atribuíulle á ETA o atentado cometido este martes en Bilbo no que resultou ferido o escolta do concelleiro do PSE-EE de Galdakao Juan Carlos Domingo.

Gabriel Ginés, de 36 anos de idade e natural de Zaragoza, presenta queimaduras de segundo e terceiro grao no 4% do seu corpo, con feridas nas mans e na cara, aínda que permanece consciente e mantén "boas" constantes vitais, segundo fontes de Osakidetza (servizo de saúde vasco).

Investigación
O artefacto estourado ao redor das 13.30 horas na rúa Zamakola, situada no barrio bilbaíno de La Peña, é, segundo as primeiras investigacións, unha bomba-lapa, composta por un quilo de amonal e colocada na parte posterior dereita do coche, ao carón do depósito de gasolina.

O Departamento de Interior do goberno vasco precisou que o vehículo é un Renault Megane, asignado ao servizo de escoltas, e que pertence á empresa de seguridade privada, Seguriber, que presta servizos para o goberno do Estado Español.

Xa que logo, o turismo non era o vehículo particular do gardacostas ferido, como informara o citado departamento con anterioridade.

O gardacostas foi atendido no lugar e, posteriormente, evacuado nunha UVI móbil ao Hospital de Cruces (Barakaldo, Bilbo) para ser atendido.

Ao parecer, a bomba estoupou no momento en que procedeu a abrir o vehículo. O edil socialista non se atopaba no interior do coche xa que estaba de vacacións en Valencia.

Obxectivo: o escolta
Precisamente, Juan Carlos Domingo mostrouse convencido de que o atentado "foi preparado máis contra el que contra min", xa que se realizou contra o coche que habitualmente usa o escolta. Esta teoría foi confirmada a primeira hora da tarde polo goberno vasco.

Ademais, un total de tres persoas resultaron feridas, con lesións de carácter leve, afectadas pola onda expansiva, segundo fontes do Departamento de Interior vasco.