Vieiros

A Rede Galega de Escolas Infatís, as galescolas, comezou este luns a súa andaina. A iniciativa, que pretende facilitar a escolarización dos nenos na lingua do país, está a ser obxecto tamén de particulares ataques mediáticos. Durante a fin de semana os xornais madrileños El Mundo e periodistadigital.com publicaron amplas reportaxes contrarias aos novos centros. Algunhas, como as deste último medio, especialmente agresivas ('A Galiza paleta das galescolas', chegaron a titular nun primeiro momento). O artigo, co cabeceiro modificado, aínda pode lerse na rede.

No caso de El Mundo, o texto comeza cunha rebuscada referencia a Rosalía de Castro e aos seus versos de “Pobre Galicia non debes / chamarte nunca española”. Pouco despois asegúrase que “simplemente é un poema escrito por unha bastarda filla de cura hai 150 anos”. Logo da estraña digresión, pasa a comparar as galescolas coas ikastolas vascas “hoxe fomentadoras do nacionalismo excluinte e furibundo”. No mesmo artigo, a deputada popular Manuela López Besteiro asegura que hai “un partido que quere xerar unha guerra lingüística”.

A pesar das críticas, Quintana mantense firme na súa aposta e lembra que cando remate a lexislatura vai haber 120 centros en todo o país, “tamén no medio rural, o que favorecerá o reequilibrio territorial”. Preguntado polos ataques mediáticos, Quintana limitouse a dicir que algúns eran “penosos e insultantes”.