Vieiros

O presidente do PPdeG, Alberto Núñez Feijoo, amosouse favorábel a apoiar o dominio .gal, por ser de carácter cultural e non territorial identificativo de Galiza. Na xuntanza que mantivo co presidente, o vicepresidente e mais o secretario da asociación PuntoGal, Feijoo destacou a necesidade de diferenciar a nosa cultura na rede.

Núñez Feijoo afirmou que Galiza, como comunidade con fortes vencellos lingüísticos, culturais, históricos e sociais, precisa dar un paso máis «para non perder o tren das tecnoloxías da información e da comunicación», e contar cun «espazo de identidade propia nesa inmensidade que é internet».

Para o presidente popular, contar cun dominio para a nosa cultura tamén terá implicacións positivas no eido económico e social «ao permitirnos identificar todos os contidos creados en Galiza coa mesma terminación».