Vieiros

Conseguir que as mulleres maltratadas poidan gozar de independencia económica respecto dos seus agresores unha vez que deciden dar o paso de deixar o fogar veuse amosando como unha necesidade fundamental. En 2006 e desde a posta en marcha do proxecto, a Vicepresidencia da Igualdade e do Benestar recibiu 467 solicitudes do chamado "salario da liberdade". Destes, concedéronse 275 e outros 192 están en trámite na actualidade.
Bautizado mediaticamente como "salario da liberdade", a paga de 600 euros ao mes durante un ano responde ás recomendacións dos expertos para axudar a combater a resinación e o sometemento que sofren moitas mulleres durante anos, en situacións de reiterado maltrato por parte das súas parellas. Durante a presentación do proxecto a finais de 2005, o vicepresidente da Xunta, Anxo Quintana, reflexionaba ao respecto que a baixa taxa de denuncias por malos tratos en Galiza estaría relacionada co problema da dependencia económica que en moitas ocasións padecen as vítimas "e que lles impide dar o paso de denunciar a súa situación".