Vieiros

A conselleira Laura Sánchez Piñón tomou en serio o cambio do decreto. Aínda así, comprobou que consensuar unha normativa non é tarefa nin moito menos doada. O primeiro borrador que puxo a conselleira enriba da mesa, e que Vieiros difundiu a mediados de decembro, contemplaba porcentaxes para a lingua do país que oscilaban entre o 56 e o 68% nos estudos primarios e secundarios. Para a educación infantil garantíase un mínimo dun 50% e falábase da aprendizaxe da lectoescrita na nosa lingua.

A primeira proposta da conselleira foi rexeitada de cheo polos populares, que consideraban que o castelán quedaba marxinado. Mais os problemas para Sánchez Piñón non viñan só dende as filas conservadoras, dentro do seu propio partido había dirixentes que pensaban que as porcentaxes eran "excesivas". Pola súa parte, dende o BNG mantíñase na mesa de negociación que era necesario ir un chisco máis aló. Aínda así, a organización consideraba que a primeira proposta era un paso máis que notábel de cara a normalización no ensino.

Os mínimos do Plan de Normalización
O día 12 deste mes, Vieiros daba a coñecer a existencia dun segundo borrador. No mesmo rebaixábase a porcentaxe de materias obrigatorias en galego ao 50% e "esquecíase" a posibilidade dunha aprendizaxe da lectoescrita integramente na lingua vernácula. A propia conselleira negou a existencia deste borrador. Porén, esta proposta, que non era outra que os mínimos do Plan de Normalización de 2004, existía e, finalmente, foi a que saíu adiante.

Os populares si estaban dispostos a discutir o segundo borrador. De feito, a proposta era moi semellante á que aprobou o propio PP nas Illas Baleares en 1997. O goberno de Jaume Matas deulle forma a un decreto que buscaba promover o catalán como "lingua vehicular do ensino non universitario". Para iso, establecíase que durante o ensino obrigatorio a metade das materias debían impartirse en catalán. Ademais, os centros encárganse de planificar a implantación progresiva do ensino na lingua propia.

Bos resultados

Nove anos despois da súa entrada en vigor, os datos do goberno balear sinalan que case o 45% dos centros de infantil xa empregan o catalán como lingua vehicular (só se imparte en castelán a lingua e literatura castelá). Preto dun 68% dos centros de primaria teñen tamén o idioma propio como vehicular. Na secundaria, os colexios que teñen o catalán como idioma preferente achéganse ao 49%. No resto dos centros, garántese que, como mínimo, a metade das materias se impartan na lingua autóctona.