Edición xeral
Industria axudou a renovar 40.000 electrodomésticos
O Plan Renove de Electrodomésticos posto en marcha pola Consellería de Innovación e Industria en setembro xa fixo posíbel a substitución de case 40.000 aparatos do fogar por outros de alta eficiencia enerxética. Aínda que falta un mes para que remate o prazo de presentación de solicitudes, xa se tramitaron 38.896 subvencións, que completaron o orzamento total destinado ao programa, cifrado en 3,1 millóns de euros. O plan serviu para subvencionar a renovación dos electrodomésticos por outros con etiquetado enerxético de clase A ou superior, para persoas residentes en Galiza. A axuda individual por aparello é de ata 75 euros no caso de frigoríficos, combis, lavadoras e lavalouzas, e de ata 150 para os conxeladores, sen superar en ningún caso o 25% do prezo do electrodoméstico.
A renovación dos equipos vai supoñer un aforro enerxético anual duns 18.444 megavatios-hora, que equivale á electricidade que consomen 5.590 familias nese intervalo de tempo. A provincia na que se tramitaron máis axudas foi a da Coruña, cun total de 16.191, o que supón o 41,6% do total; seguida de Pontevedra, con 12.622; Lugo, con 5.230 e Ourense, con 4.853 (o 12,5% do total). A meirande parte das axudas que se outorgaron foron para renovar lavadoras, cun 49,2% do total, seguidas de frigoríficos (31,3%), conxeladores (10,3%) e lavalouzas (9,2%). Adheríronse ao plan 809 comercios galegos, a meirande parte deles das provincias da Coruña e Pontevedra. As axudas tramitáronse a través da páxina web do Instituto Enerxético de Galicia. O plan repetirase o ano que vén, aínda que o orzamento aumentará ata os 4 millóns de euros.
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto