Vieiros

Con esta iniciativa, desde a Consellaría pretenden tamén que familiares dos represaliados se acheguen até o barco e boten luz sobre a historia dos que sufriron para que os demais poidamos saber dela. Foron xa varias, segundo o departamento da Xunta, as persoas que xa se achegaron con esta finalidade ao Hidria II. Outras intercambiaron experiencias nestas 10 vilas nas que ten recabado o Barco.

Unha das realidades silenciadas que se contan neste barco é o relato da represión iniciada tras o golpe militar, que "se ensañou na costa co tecido sindical que se creara arredor das fábricas conserveiras e dos traballadores mariñeiros". Segundo explica a Consellaría, líderes sindicais e persoas significadas na loita polas liberdades e polas melloras das condicións laborais foron asasinadas, sufriron prisión ou foron repudiadas. Esta e outras das represións practicadas polo franquismo son o que atoparon no Barco da Memoria os máis de 13.000 visitantes que se achegaron a el neste ecuador da súa andadura pola costa galega.

Esta embarcación alberga tamén unha exposición, "Os mártires do mar: Represión franquista contra os mariñeiros galegos", ademais de varias proxeccións audiovisuais e outras iniciativas que se desenvolven xa en terra nas localidades que visita o buque. Os organizadores dan un paso máis e procuran que a el non só acudan as persoas viculadas coa repressión, "senón tamén persoas que descoñecían a dimensión das consecuencias do alzamento franquista" para dar a coñecer esta realidade.

O Hidria II foi botado ao mar en Cambados o pasado día 18 de xullo. Do 15 ao 18 de agosto estará na Coruña, en Mugardos pasará do 19 ao 21, a Ferrol dirixirase do 22 ao 24, para baixar logo até a Ría de Vigo o 26 e a Cangas, os días 27 e 28. Finalmente, en setembro, estará en Vigo nas xornadas do un e até o 3, en Raxo do 29 ao 31 e en Vilagarcía do 4 ao 6. O día 26 de agosto o Barco da Memoria percorrerá a ría de Vigo nunha homenaxe á xente do mar asasinada e fondeada na ría.